ليه فى حبايب بيبقو كدابين

من طرف Manshy_fox الخميس أكتوبر 18, 2007 5:44 pm

لو سألت اي واحد في الدنيا مش بس في المنتدي لو اكتشفت ان حبيبك بيخونك او بيكدب عليك تعمل ايه هيقول من غير كلام طبعا اكيد هسيبه او مش هعرفه تاني
او...او..او...اي حاجة من الحاجات اللي احنا نعرفها دي

لكن انك تلاقي حد مخدوع في حبيبه و عارف انه بيخدعه او ممكن يكون بيخدعه او بيكدب عليه
وراضي انه يفضل معاه دي بقي الجديدة

ده الموضوع اللي حبيت اكلمكم فيه النهارده
يعني ايه حبايب الكدابين دي؟

هقوللكم يعني ايه

انا لاحظت في الفترة الاخيرة دي من خلال المشاكل اللي بتجيلي هنا و بقابلها برة و بسمعها من الناس ظاهرة جديدة
و اتمني من ربنا انها تكون ظاهرة فعلا

من اول المواقف اللي خدتني و شدتني ليها الموقف ده

واحد بيحب واحده والبنت دي عذبته كتير اوي وجرحته كتير اوي
اكتشف الاخر انها تعرف واححد تاني من غير ما يعرف و يمكن في نفس الوقت اللي عرفته فيه
لحد هنا وكل شيئ طبيعي..نيجي بقي للي مش طبيعي ابدا

الولد ده عرف كل الكلام ده و استمر معاها عادي ولا كانه يعرف حاجة
طب بتعمل كده ليه يابني؟ -اصلي بحبها و مش قادر ابعد عنها
يابني دي بتخونك و بتكدب عليك وبتبيعك في الثانية بدل المرة الف
-طب هعملها ايه..هي مسيرها تندم و تعرف انها غلطانة وانا بحبها واللي بيحب بيسامح بقي

ويا ريت علي كدة البنت الظاهر زهقت منه و جت قالتله علي كل حاجة
وخلينا اصحاب احسن
هو بقي يعمل ايه؟-خلاص انا معاكي و هفضل جمبك

الموقف التاني وانا اسف انه برضه البنت فيه هي اللي بتجرح
واحد بيحب واحده واستمروا في قصة الحب دي اكتر يمكن من سنة و نص وعايز اقوللكم قصة حب مفيهاش غلطة
بعد السنة و نص دول البنت اختفت شوية وفجاة الولد يسمع هيصة و زغاريط في الشارع !!! فيه ايه؟

اصل فلانة اتخطبت
طبعا الولد انهار و مبقاش مصدق نفسه ومفيش غير كلمة واحده علي لسانه ....ليه

بعد كام شهر الخطوبه اتفسخت و اتصلت البنت بالولد تاني طبعا ندمانة و عايزة ترجعله و مش عارفه هي عملت الكلام ده كله ازاي
وكان غصب عنها والاسطوانه المشروخه دي اللي احنا عارفينها
طبعا رجعلها...يابني بلاش ها تعمل فيك كده تاني..اللي يبيع مرة يبيع مرة يبيع الف
مفيش فايده....قال لازم اديها فرصه تانية

طبعا عارفين اللي حصل..مفيش كام شهر و قالتله انا مش عايزة اكلمك انت بالنسبالي مش اكتر من اخ
ولتاني مرة الولد مش بيصدق اللي بيحصل
الاغرب بقي!!!!...بعد ما قدر يستوعب الصدمة وكل اللي حصل...يقرر انه عايز يكلمها تاني و يحاول يسألها اذا كانت كدة مرتاحة ولا لأ

كل ده مش عيب لو كانت البنت كويسة و ماعملتش حاجة قبل كدة وبتتعامل معاه كويس ..يعني هنعديها كدة
لكن للأسف حتي و هي معاه مش بتكلمه ولا بتعبره ولا ببتصل بيه ولا أي حاجة

كل ده وعايز يرجعلها و يتحايل عليها!!!...-اصله بيحبها و مش قادر يعيش من غيرها

الموقف التالت وده بقي ولد هو اللي بيجرح فيه عشان مبقاش ظلمت البنات بس

واحده بتحب واحد و برضه كانت حكايتهم حلوة و جميله و ..و..و..لكن
ايوة عدي كام شهر و قالتلي بدأ يتغير ..مش هو ده اللي كان ملاك
مبقاش يسال عليا زي الاول مبقاش يتطمن ولا يتكلم
خلاص ولا كانه يعرفني اساسا
و بقي بيفضل عليا كل الناس حتي لو واحد لسة عارفه من خمس دقايق
بقيت من الاخر شيئ ثانوي في حياته بعد ما كنت كل حاجه في حياته
وفين و فين لما يتصل بيا ولا يكلمني

طب يا بنتي ما تحاولي تتكلمي معاه في الحكاية دي
-اتكلمت معاه كتيرومفيش فايده

طب سيبيه اكيد مش بيحبك ولا بيقدرك
-مش قادرة عشان بحبه بجد

ودي المواقف التلاته...خيانة...كدب...اهمال

وفي التلات حلات مفيش حد منهم رضي يسيب حبيبه مع ان التلات حاجات دول مستحيل حد يقدر يعيش معاها

انا بجد مش قادر افهم ليه عملوا كدة..و مش هما بس لأ فيه غيرهم و غيرهم وغيرهم

ليه بقينا بنحب اللي بيجرحنا و بيكدب علينا ؟
ليه بقينا نعيش للي عمره ما عاش يوم لينا؟

ليه قلوبنا الطيبين
تبقي حبايب الكدابين....؟